profil tokoh

Dr. Prasetyo

Guruku Wartawanku

 

Guru ingkang Tlaten Nyerat Dados guru saha tlaten nyerat wonten media massa, makaten kalih profesi ingkang samenika dipuntekuni dening Drs. Prasetyo, dwija wulangan Basa Jawi wonten SMPN 1 Bukateja, Purbalingga, Jateng. “Pak Pras” makaten timbalanipun, kelairan Kebumen, 14 September 1966, utawi samenika sampun mlebet yuswa 46 tahun.
Pak Pras samenika kagungan putra kalih, Bagas Anindito (12) saha Prasandi Pinasthiko (8), kekalihipun taksih ngangsu kawruh wonten SD Mitra Penabur, Bina Harapan Purbalingga. Dene garwa kinasihipun, Titis Sri Andijati (39), samenika dados perawat wonten Rumah Sakit Prof Dr. Margono Soekaryo(RSMS) Purwokerto. Saben dintenipun, Pak Pras dados dwija wonten SMPN 1 Bukateja, ingkang mapan wonten Jl. Purwandaru 43 Bukateja, peneripun mlebet tlatah Desa Kedungjati, Kecamatan Bukateja, Purbalingga, Jateng.

Sampun 12 tahun langkung, Pak Pras nggulawenthah lare-lare wonten sekolah kasebut. Lan samenika, Pak Pras ugi sampun nyandhang guru profesional, awit sampun lulus saking Pendidikan dan Latihan Profesi Guru (PLPG) ingkang dipun adani dening Rayon XI Universitas Negeri Yogyakarta (UNY), tahun 2008 kepengker. "Kula rumaos mongkog dados guru mata pelajaran Basa Jawi. Kula ngrumaosi, mucal lare-lare supados saged wicantenan kanthi leres ngangge Basa Jawi, lan ngertos unggah-ungguh wonten jaman samangke, mboten gampil. Mila makaten, kita kedah pinter aggenipun paring wucalan, supados lare remen dhumateng wulangan Basa Jawi," ujaripun Drs Prasetyo, alumni Jurusan Pendidikan Bahasa Jawa IKIP Yogyakarta (samenika UNY) tahun 1990 ingkang kagungan klangenan arung jeram menika.

Kangge narik kawigaten anggenipun mucal kasebut, Pak Pras asring ngginakaken modhel pembelajaran ngangge multi media. Mila makaten, LCD saha Laptop tansah dipunginakaken dening Pak Pras, menawi mucal Basa Jawi. Babagan mucal ngangge multimedia kasebut, sampun dipungunakaken Pak Pras sampun kawit tahun 2006 gantos samenika. Asilipun, lare-lare remen menawi dipun wucal wulangan Basa Jawi. Kanthi ngginakaken multi media kasebut, Pak Pras ngendika, kagungan koleksi puluhan CD wulangan Basa Jawi, awujud pacelathon, tembang macapat, tembang dolanan, tembang Banyumasan, dongeng, cariyos wayang, tutorial aksara Jawa, daghelan Banyumasan, kethoprak, film-film Basa Banyumasan lan sapanunggalanipun. CD-CD kasebut dipunkoleksi dening Pak Pras saking anggenipun asring ndherek Diklat wonten Lembaga Penjaminan Mutu Pendidikan (LPMP) Semarang, seminar, worshop , ngopi kagunganipun rencang, tumbas wonten toko, lan nyuwun kiriman saking lembaga-lembaga ingkang magepokan kaliyan Basa, sastra saha kabudayan Jawa. "Kula kagungan perpustakaan piyambak kangge nyimpen koleksi CD-CD menika. Dados, perpustakaan alit ingkang kula damel wonten griya kula, kejawi kathah koleksi awujud buku, kalawarti saha ariwarti, ugi kathah koleksi CD-CD nipun, " makaten pangandikanipun Pak Pras ingkang manggen wonten RT 3 RW 9 Desa Penaruban, Kecamatan Kaligondang, Purbalingga. CD-CD kasebut, ujaripun Pak Pras, asring dipunsetel wonten sangajenging lare-lare . Lan lare-lare rumaos remen nonton tayangan wonten LCD, saengga wulangan saged dipuntampi kanthi gampil. Makaten ugi menawi wulangan ngrembag tembang Macapat, kejawi teori, ugi dipunparingi tuladha tembang-tembang Macapat ingkang dipun tembangaken dening sinden-sinden ingkang kondhang lumantar CD.

"Kanthi tlaten, kula ambali wongsal wangsul ngantos lare saged nembang. Lan tembang-tembang kasebut kanthi format file MP3, kula wajibaken dipuncopy dening lare-lare lumantar HP. Lajeng kula wajibaken lare-lare nyinaoni tembang Macapat lumantar HP nipun piyambak-piyambak. Tundhonipun, asilipun sae, kathah lare-lare ingkang saged nembang Macapat kanti kula peksa makaten," ujaripun Pak Pras ingkang sapun nate mucal wulangan Basa Jawi ugi wonten SMA Negeri 1 Kemangkon, Purbalingga minangka guru honorer berstatus PNS.
Samenika, kejawi kesibukanipun mucal, Pak Pras ugi aktif nyerat wonten media massa. Panjenenganipun samenika dados kontribuor wonten Harian Warta Jateng (Kompas Group) kangge liputan tlatah Banyumas sakupenganipun. Ugi dados Redaktur Tabloid Derap Perwira, tabloid ingkang terbit kalih minggu sepisan ingkang dipunterbitaken dening Humas Setda Purbalingga.

Sederengipun dado guru, Pak Pras dados wartawan wonten Harian Bernas Jogja.
Kejawi remen nyerat wonten media massa, Pak Pras ugi kagolong panyerat buku. Buku-buku ingkang sampun dipunterbitaken, inggih menika "Pendopo untuk Rakyat", biografi Bupati Purbalingga Drs Triyono Budi Sasongko, M.Si. Buku kasebut kacithak 10 000 iji, kanthi penerbit PT Bayu Indra Grafika Yogyakarta.  Buku sanesipun, "Perjalanan Soetarto Rachmat-Dari Toyareka ke Pendapa Cahyana", biografi Wakil Bupati Purbalingga. Buku kasebut ugi dipunerbitaken dening PT Bayu Indra Grafika, Yogyakarta. Lajeng, buku "Wisata Kuliner Purbalingga", buku "Kumpulan Koleksi Cerita Rakyat Purbalingga", buku "Petuah dan Kisah Bijak Budaya Jawa", buku "Jurnalistik Abu-abu" lan sapiturutipun.

Kejawi nyerat buku, Pak Pras ingkang samenika aktif dados sekretaris Musyawarah Guru Mata Pelajaran (MGMP) Basa Jawa SMP Kabupaten Purbalingga, ugi asring nyerat LKS (Lembar Kerja Siswa) saha damel sarta ngedhit soal-soal ulangan saha ujian wulangan Basa Jawi.

"Kula remen nyerat, amargi kawit kuliah kula sampun saged pados arta piyambak kanthi dados juru warta wonten Koran Masa Kini Yogyakarta. Samenika Koran Masa Kini sampun kukut. Ananging, hobby nyerat ngantos samenika taksih kula tekuni. Kula gadhah prinsip, tiyang dipunregani dening tiyang sanes kejawi saking tumindak saha tuturipun, ugi seratanipun," makaten andharanipun Pak Pras ingkang ngagumi penulis Amerika Serikat, Ernest Hemingway, ingkang sampun nate pikantuk Hadiah Pulitzer saha Hadiah Nobel nalika enomipun.
Samenika, kejawi dados guru saha rajin nyerat, Pak Pras ugi aktif wonten maneka organisasi. Antawisipun, dados Humas wonten Forum Ilmiah Guru (FIG) Purbalingga, Kepala Bidang Pengabdian Masyarakat Ikatan Sarjana Pendidikan Indonesia (ISPI) Purbalingga, Sekretaris Bidang Penerbitan Asosiasi Guru Penulis Indonesia (Agupena) Purbalingga, mantan Ketua Forum Wartawan Purbalingga (FWP) lan samenika dados anggota FWP, anggota Persatuan Guru Republik Indonesia (PGRI) Purbalingga, uga Kasi Humas Pengurus Cabang Taekwondo Purbalingga.